Alyor Gulga to'la dunyo, shodumon do'st-yor,
Go'yoki davrada faqat gul, chechak.
Bu ikki oshiqdir, ikki baxtiyor,
Bir dardga aylangan bu ikki yurak.
Sadoqat taxtida yuzlaring gulgun,
Olamni yoritgay sevging shu'lasi.
O'zgacha ko'rinur har narsa bu kun -
Kelur har narsaning senga havasi.
Go'yo bo'ston ichra ochilgan chechak -
Bu harir oq libos poklik timsoli.
Umr go'zal bo'lur: baxtli kelinchak,
Kafolat beradur ko'zgu misoli.
Bu kun to'y kechasi, sevgi ayyomi.
Bu kun to'y kechasi, shodlik toshadi.
Bu ikki baxtiyor - dunyo salomi,
Ikki dil haoytga qadam tashladi.
Bu, barcha ko'rgilik ko'rgan hayotdir,
Hayot barchasiga qilgaydir toqat.
Umr deganlari zahmat, sabotdir,
Umr deganlari ishonch, sadoqat.
Ko'kda oy, yulduzlar kirganday so'zga
Aziz boshingizga sochar nurini.
Men oy shu'lasini tilayman Sizga,
Men sizga tilayman yulduz umrini.
Sizni qutlar bu kun do'stu qadrdon,
Yosh bahor umringiz nurlarga to'lsin.
Bo'lmasin jafolar, bo'lmasin hijron,
Do'stlarim, ezgu Baxt muborak bo'lsin!
Rauf Parfi, 1976 yil
